தினத்தந்தி செய்தி:பொதுக்குழு தீர்மானம்[27-4-2014]

அரசு போக்குவரத்து கழக காலிப்பணியிடங்களை நிரப்ப வேண்டும் பணியாளர்கள்
சம்மேளன பொதுக்குழு தீர்மானம்
ஈரோடு,

அரசு போக்குவரத்துக்கழகத்தில் காலிப்பணியிடங்களை நிரப்ப வேண்டும் என்று
பணியாளர்கள் சம்மேளன பொதுக்குழு கூட்டத்தில் தீர்மானம்
நிறைவேற்றப்பட்டது.
பொதுக்குழு கூட்டம்

தமிழ்நாடு அரசு போக்குவரத்து கழக பணியாளர்கள் சம்மேளன ஈரோடு, கோவை,
திருப்பூர் மண்டல பொதுக்குழு கூட்டம் ஈரோட்டில் நடந்தது.

கூட்டத்துக்கு ஈரோடு மாவட்ட தலைவர் டி.கே.பாலகிருஷ்ணன் தலைமை தாங்கினார்.
இதில் சம்மேளனத்தின் மாநில பொதுச்செயலாளர் டி.வி.பத்மநாபன், தலைவர்
எஸ்.ஷாஜஹான், அமைப்பு செயலாளர் எம்.கார்த்திகேயன் ஆகியோர் சிறப்பு கலந்து
கொண்டு பேசினர்.

கூட்டத்தில் நிறைவேற்றப்பட்ட தீர்மானங்கள் வருமாறு:–
நிதி வழங்கவேண்டும்

தமிழ்நாட்டில் அரசு போக்குவரத்து கழகங்கள் மீளமுடியாத கடன் சுமையில்
உள்ளது. இதனை தீர்க்க தமிழக பட்ஜெட்டில் அரசு போக்குவரத்து கழகங்களுக்கு
அரசு உரிய நிதி வழங்கவேண்டும். போக்குவரத்து தொழிலாளர்களை அரசு ஊழியர்களாக
அறிவிக்க வேண்டும்.

தமிழக அரசு போக்குவரத்து கழகங்களை சீர்படுத்த ஒவ்வொரு மண்டலத்துக்கும் தனி
அதிகாரிகளை நியமிக்க வேண்டும். பிப்ரவரி 2013–ல் இருந்து அகவிலைப்படி
உயர்வு நிலுவை தொகை, கூட்டுறவு சங்கங்களுக்கு வழங்க வேண்டிய நிலுவை தொகை,
ஈட்டிய விடுப்பு சம்பளம், பென்சன் முன் கூட்டு தொகை, வைப்பு நிதி கடன் என
சுமார் ரூ.450 கோடி தொழிலாளர்களுக்கு வழங்கப்படாமல் நிலுவையில் உள்ளது.
இதனை காலம் தாழ்த்தாமல் வழங்க போக்குவரத்து கழக நிர்வாகங்கள் நடவடிக்கை
எடுக்க வேண்டும்.
பணி நிரந்தரம்

தணிக்கையாளர்கள், ஓட்டுனர் பயிற்றுனர்களுக்கு வேலை நேரம் 8 மணி நேரமாக
நிர்ணயம் செய்ய வேண்டும். இவர்களுக்கு 2010 ஊதிய ஒப்பந்த உயர்வு பலன்களை
காலம் தாழ்த்தாமல் வழங்க வேண்டும். தொழிற்சங்கத்தை சேர்ந்த நிர்வாகிகள்
பலர் வேலைக்கு செல்லாமல் இருப்பதற்காக ‘ஆன் டூட்டி‘ அனுமதி
வாங்குகின்றார்கள். இதனை நிர்வாகம் தவிர்க்க வேண்டும்.

வேலை வாய்ப்பு அலுவலகம் மூலம் பணி நியமனம் செய்யப்படும் புதிய ஓட்டுனர்,
நடத்துனர்கள் 240 நாட்கள் பணி முடித்தவுடன் பணி நிரந்தரம் செய்ய வேண்டும்.
ஓட்டுனர் மற்றும் நடத்துனர்களின் ஒரு நாள் பணிக்கு புறநகர் பஸ்களின்
இயக்கம் 200 கி.மீ. எனவும், நகர பஸ்களின் இயக்கம் 150 கி.மீ. எனவும்
நிர்ணயம் செய்ய வேண்டும்.

காலியிடங்களை..

காலியாக உள்ள 2 ஆயிரம் தொழில்நுட்ப பணியாளர்கள் மற்றும் பாதுகாவலர் பணி
இடங்களை நிரப்ப வேண்டும். தொழில்நுட்ப பணியாளர்களுக்கு பதவி உயர்வு
வழங்கவேண்டும். பாதுகாவலர்களுக்கு பதவி உயர்வு வழங்கவேண்டும்.

மேற்கண்டவை உள்பட பல தீர்மானங்கள் நிறைவேற்றப்பட்டன.
கூட்டத்தில் சம்மேளனத்தின் கோவை மாவட்ட தலைவர் கே.குப்புசாமி, திருப்பூர்
மாவட்ட தலைவர் எம்.துளசிமணி, பொதுச்செயலாளர் ஏ.பெரியசாமி, பொருளாளர்
முருகானந்தம் உள்பட ஏராளமான நிர்வாகிகள், உறுப்பினர்கள் கலந்து கொண்டனர்.
முன்னதாக சம்மேளனத்தின் ஈரோடு மாவட்ட பொதுச்செயலாளர் கே.குணசேகரன் வரவேற்று
 பேசினார். முடிவில் பொருளாளர் ஆர்.ராகவேந்திரன் நன்றி கூறினார்.
நன்றி:
http://www.dailythanthi.com/2014-04-27-the-conference-board-to-fill-panels-or-erode-news
பதிவு
 செய்த நாள் : Apr 28 | 01:45 am