மார்க்சிஸ்ட் கம்யூனிஸ்ட் கட்சியின் மாநில செயலாளர் ஜி. ராமகிருஷ்ணன் வெளியிட்டுள்ள அறிக்கையில்,
தமிழ்நாடு அரசு போக்குவரத்துத் தொழிலாளர்களின் பழைய ஊதிய ஒப்பந்தம் காலாவதியாகி 15 மாதங்கள் ஆன பிறகும் இதுவரையில் புதிய ஊதிய உயர்வு ஒப்பந்தம் உருவாகவில்லை. ஊதிய உயர்வு புதிய ஒப்பந்தத்தை உருவாக்க வேண்டுமென சிஐடியு உள்ளிட்ட அனைத்து தொழிற்சங்கங்களும் தொடர் போராட்டங்களை நடத்தி வருகின்றனர்.
இந்நிலையில் நேற்றைய முன்தினம் (26.12.14) தொழிலாளர் துறை சிறப்பு துணை ஆணையர் முன்பு முத்தரப்பு பேச்சுவார்த்தை நடைபெற்றது. 11 தொழிற்சங்கங்கள் பேச்சுவார்த்தையில் கலந்து கொண்டன. ஒப்பந்த காலம், நிலுவைத் தொகை வழங்குவது ஆகிய பிரச்சனைகளில் தொழிற்சங்கங்களின் கோரிக்கைகளை அரசு ஏற்றாலும் தொழிலாளர்களின் முக்கிய கோரிக்கையான ஊதிய உயர்வு ஒப்பந்தத்திற்கான பேச்சுவார்த்தையை துவக்க வேண்டுமென்ற தொழிற்சங்கங்களின் கோரிக்கையை அரசு ஏற்க மறுத்துவிட்டது.
ஊதிய உயர்வு பேச்சுவார்த்தை குறித்து எந்த உறுதியையும் போக்குவரத்து நிர்வாகம் அளிக்கவில்லை. இதனால், ஏற்கனவே தொழிற்சங்கங்கள் முடிவெடுத்த அடிப்படையில் வேலைநிறுத்தப் போராட்டம் 29 ஆம் தேதியிலிருந்து துவங்க இருந்தது.
ஆனால், போக்குவரத்து நிர்வாகம் போராடும் தொழிலாளர்களுடைய இம்மாத ஊதியத்தை வெட்டியதால் மாநிலம் முழுவதும் தொழிலாளர்கள் அனைவரும் இன்றே போராட்டத்தை துவக்கியுள்ளனர். போக்குவரத்து தொழிலாளர்களின் நியாயமான வேலைநிறுத்தப் போராட்டத்தை மார்க்சிஸ்ட் கம்யூனிஸ்ட் கட்சியின் மாநில செயற்குழு ஆதரிக்கிறது.
தொழிலாளர்களுயை போராட்டத்தை உடைப்பதற்கு திருவண்ணாமலை உள்ளிட்டு மாநிலத்தின் பல பகுதிகளில் ஆளும் கட்சியைச் சார்ந்தவர்கள் பணிமனைக்குள் புகுந்து தாக்குவதாக தகவல்கள் வருகின்றன. இத்தகைய தவறான அணுகுமுறையை மாநில அரசு உடனடியாக தடுத்து நிறுத்த வேண்டும்.
தொழிலாளர்களுடைய ஆதங்கத்தை உணர்ந்து மாநில அரசு இன்றே அனைத்து போக்குவரத்து தொழிற்சங்கங்களையும் அழைத்து ஊதிய உயர்வு ஒப்பந்தத்தை உருவாக்கிட பேச்சுவார்த்தையை நடத்தி சுமூகமாக பிரச்சனைகளுக்கு தீர்வு காண வேண்டுமென மார்க்சிஸ்ட் கம்யூனிஸ்ட் கட்சியின் மாநில செயற்குழு தமிழக அரசை வலியுறுத்துகிறது. இவ்வாறு கூறியுள்ளார்.
---------------
போக்குவரத்துத் தொழிலாளர்களுடன் பேச்சுவார்த்தை நடத்தி தீர்வு காண வேண்டும்: திருமாவளவன்.
போக்குவரத்துத் தொழிலாளர்களின் வேலைநிறுத்தப் போராட்டத்திற்கு விடுதலைச் சிறுத்தைகள் ஆதரவு என்றும், தொழிற்சங்கங்களுடன் பேச்சுவார்த்தை நடத்தி தீர்வு காண வேண்டும் திருமாவளவன் கூறியுள்ளார்.
இதுதொடர்பாக அவர் வெளியிட்டுள்ள அறிக்கையில்,
தமிழ்நாடு அரசு கழகப் போக்குவரத்துத் தொழிலாளர்களுக்கான ஊதிய உயர்வுக் குறித்து முன்றாண்டுகளுக்கு ஒருமுறை பேச்சுவார்த்தை நடுத்துவது வழக்கம். கடந்த 1977 ஆம் ஆண்டு உருவான ஒப்பந்தத்தின் அடிப்படையில் இந்நடைமுறை பின்பற்றப்பட்டு வருகிறது.
இதனை ஐந்தாண்டுகளுக்கொருமுறை என மாற்றுவதற்கு, தமிழக அரசு 2001 ஆம் ஆண்டு முயற்சித்தது. தொழிற்சங்களின் கடும் எதிர்ப்பால் இம்முயற்சிக் கைவிடப்பட்டது. கடந்த 2010 ஆம் ஆண்டு நடைப்பெற்றப் பேச்சுவார்த்தைக்குப் பின்னர், 2013 ஆகஸ்ட் மாதம் முறைப்படி பேச்சுவார்த்தை நடத்தி இருக்க வேண்டும்.
ஆனால் கடந்த ஓராண்டுக்கு மேலாக தமிழக அரசு இந்த நடைமுறையை தள்ளிப்போட்டு வந்தது.இவ்வாறு காலம் தாழ்த்துவதன் மூலம் ஊதிய உயர்வுத் தொடர்பானப் பேச்சுவார்த்தையை ஐந்தாண்டுகளுக்கொருமுறை என மாற்றுவதற்கு மறைமுகமான முயற்சிகளை மேற்கொள்கிறது என அய்யப்பட நேர்ந்துள்ளது.தொழிற்சங்கங்களின் தொடர்ச்சியான அழுத்தத்தின் காரணமாக இரண்டுகட்டப் பேச்சு வார்த்தை நடைபெற்றது.
எனினும் அது தோல்வியில் முடிவடைந்தது.ஏனெனில் அரசுத் தரப்பிலிருந்து முடிவெடுக்கும் அதிகாரத்தில் உள்ள அதிகாரிகள் ஒருவரும் அப்பேச்சுவார்த்தையில் பங்கேற்கவில்லை என்பது குறிப்பிடத்தக்கது. அனைத்துத் தொழிற்சங்கங்களும் ஒருங்கிணைந்து திசம்பர் 29 முதல் வேலைநிறுத்தப் போராட்டம் அறிவித்துள்ள நிலையிலும், அரசுத் தரப்பில் அதனை ஒரு பொருட்டாக எடுத்துக் கொள்ளவில்லை என்பது தெரிய வருகிறது.சனவரி 30,2015க்கு பின்னர், அரசின் கருத்தைக் கேட்டப் பிறகு மீண்டும் பேசுவோம் என அரசு அதிகாரிகள் தெரிவித்துள்ளனர்.அரசின் இந்த அணுகுமுறை அனைத்துத் தொழிற்சங்கங்களை அவமதித்துள்ளது. தொழிற்சங்கங்களின் போராட்ட அறிவிப்புக்குப் பிறகு தொழிலாளர்களை உருட்டி மிரட்டிப் பணியவைக்கும் முயற்சியில் ஈடுபடுவதாகத் தெரிகிறது.அரசின் இத்தகையப் போக்கை விடுதலைச் சிறுத்தைகள் வன்மையாகக் கண்டிக்கிறது.
பொதுமக்களின் நலன் கருதியும்,தொழிலாளர்கள் நலன் கருதியும்,தொழிற்சங்கங்களின் வேலைநிறுத்தப் போராட்டத்தைத் தவிர்க்கும் வகையில், தொழிற்சங்கப் பிரிதிநிதிகளுடன் மீண்டும் பேச்சுவார்த்தை நடத்த வேண்டும் எனவும்,தொழிற்சங்கங்களின் கோரிக்கைகளைப் பொறுப்புடன் பரிசீலிக்க வேண்டுமெனவும் தமிழக அரசுக்கு விடுதலைச்சிறுத்தைகள் வேண்டுகோள் விடுக்கிறது. போக்குவரத்துத் தொழிலாளர்களின் நியாயமானக் கோரிக்கைகளை ஆதரிக்கும் வகையில் தொழிற்சங்கங்களின் வேலை நிறுத்தப் போராட்டத்தை விடுதலைச்சிறுத்தைகள் வரவேற்கிறது. திசம்பர் 29 முதல் தொடங்கும் இந்த வேலை நிறுத்தப் போராட்டத்தில் விடுதலைச்சிறுத்தைகளின் தொழிற்சங்கமான அறிவர் அம்பேத்கர் போக்குவரத்து தொழிலாளர் விடுதலை முன்னணி முழுமையாக பங்கேற்கும் என்பதுடன் இப்போராட்டத்தை அமைதிவழியில் வெற்றிகரமாக நடத்துவதற்கு அனைத்து அரசியல் கட்சிகளும்,பொதுமக்களும் ஒத்துழைப்பு நல்க வேண்டுமென விடுதலைச்சிறுத்தைகள் சார்பில் கேட்டுக் கொள்கிறோம். இவ்வாறு திருமாவளவன் கூறியுள்ளார்.
------------------------------
போக்குவரத்துத் தொழிலாளர்களின் ஊதிய உயர்வு! முதலமைச்சர் தொழிற்சங்கத் தலைவர்களுடன் பேசவேண்டும்: வைகோ
மதிமுக பொதுச்செயலாளர் வைகோ வெளியிட்டுள்ள அறிக்கையில்,
தமிழகத்தில் உள்ள அரசு போக்குவரத்துக் கழகங்களில் ஒரு இலட்சத்து 43 ஆயிரம் தொழிலாளர்கள் பணியாற்றி வருகின்றனர். மூன்றாண்டுகளுக்கு ஒருமுறை பேச்சுவார்த்தையின் மூலம் இவர்களுக்கு ஊதிய உயர்வு கிடைக்க வேண்டும். சென்ற 2013 ஆம் ஆண்டு செப்டம்பர் மாதத்தில் இருந்து கிடைக்க வேண்டிய ஊதிய உயர்வு பேச்சு வார்த்தை நடைபெறாமல், கடந்த 16 மாதங்களாக தொழிலாளர்கள் ஊதிய உயர்வு கிடைக்காமல் சிரமப்பட்டுக் கொண்டிருக்கிறார்கள். பேச்சு வார்த்தையின் மூலம் அவர்களுக்குக் கிடைக்க வேண்டிய இதரப் பலன்களும் கிடைக்கவில்லை.
இதன் காரணமாக அரசு போக்குவரத்துக் கழகங்களில் உள்ள எம்.எல்.எப். சங்கம் உட்பட 11 சங்கங்களைச் சேர்ந்த தொழிற்சங்கத் தலைவர்கள் நிர்வாகத்திற்கு வேலை நிறுத்த நோட்டீஸ் கொடுத்திருந்தனர். அதன் மீது 26.12.2014 அன்று தொழிலாளர் துறை அதிகாரியின் முன்பு பேச்சுவார்த்தை நடைபெற்றது. அதைத் தொடர்ந்து நேற்று 27.12.2014 தொழிலாளர் துறை அதிகாரிகள் முன்பு பேச்சுவார்த்தை நடைபெற்றும் சுமூகமான தீர்வு கிடைக்கவில்லை. இந்த சூழ்நிலையில்தான் அனைத்துத் தொழிற்சங்கங்களும் 29 ஆம் தேதி முதல் வேலை நிறுத்தம் செய்ய அறிவிப்பு செய்துள்ளன.
தொழிலாளர்களின் கோரிக்கைகள் மிகவும் நியாயமானவை. தமிழர் திருநாளாம் தைப் பொங்கல் நெருங்கி வரும் வேளையில் தொழிலாளர்களின் போராட்டத்தினால், தமிழக மக்களுக்கு குறிப்பாக பேருந்து பயணிகளுக்கு ஏற்படுகின்ற சிரமங்களையும், இன்னல்களையும் கருத்தில் கொண்டு, தமிழக அரசு அனைத்துத் தொழிற்சங்கங்களுடன் மீண்டும் பேச்சுவார்த்தை நடத்தி பிரச்சனைக்கு சுமூகமான தீர்வு ஏற்பட உடனடி நடவடிக்கை எடுக்க வேண்டுகிறேன்.
இவ்வாறு வைகோ கூறியுள்ளார்.
------------------------------
வேலைநிறுத்தத்தை நடத்தும் நிலைக்கு போக்குவரத்துக்கழக தொழிலாளர்களை தள்ளியதே தமிழக அரசுதான்: ராமதாஸ்
வேலைநிறுத்தத்தை நடத்தும் நிலைக்கு போக்குவரத்துக்கழக தொழிலாளர்களை தள்ளியதே தமிழக அரசுதான்: ராமதாஸ்
கருத்துகள் இல்லை:
கருத்துரையிடுக